जत तालुक्यात राज्याचा पहिला पायलट प्रोजेक्ट – रोजगार हमी योजनेला नवे बळ

 आमदार गोपीचंद पडळकर आणि मंत्री भरत गोगावले यांच्या हस्ते शुभारंभ

जत तालुका रोजगार हमी योजनेचा (रोहयो) राज्यातील पहिला पायलट प्रोजेक्ट म्हणून निवडला गेला आहे. यामुळे तालुक्यातील स्थानिकांना रोजगाराच्या संधी उपलब्ध होणार आहेत. या महत्त्वपूर्ण योजनेचा अधिकृत शुभारंभ गुरुवार, 13 तारखेला, तहसील कार्यालय जत येथे मंत्री भरत गोगावले यांच्या हस्ते पार पडणार आहे. यासंदर्भात आमदार गोपीचंद पडळकर यांनी पत्रकार परिषदेत माहिती दिली.

आमदार गोपीचंद पडळकर

योजनेचे वैशिष्ट्ये आणि उद्दिष्टे

• गेल्या आठ वर्षांपासून बंद असलेली रोजगार हमीची कामे पुन्हा सुरू करण्याचा शासनाचा निर्णय.
• राज्य सरकारने जत तालुक्याला पहिल्या पायलट प्रकल्पाचा दर्जा दिला.
• बांबू उद्योगाला विशेष प्राधान्य, ज्यामुळे ग्रामीण भागातील लोकांना अधिक संधी मिळणार.
• 57000 जॉब कार्ड धारकांना लाभ, ज्यामुळे मोठ्या प्रमाणात रोजगार उपलब्ध होणार.
• राज्य आणि केंद्र सरकार मिळून प्रत्येक जॉब कार्डसाठी वार्षिक 50,000 रुपयांपर्यंतचा निधी उपलब्ध.
• भविष्यात 70,000 रुपयांपर्यंत निधी वाढविण्याची शक्यता, ज्यामुळे 350-400 कोटी रुपये जत तालुक्यात गुंतवले जातील.

कार्यक्रमास मान्यवरांची उपस्थिती

या कार्यक्रमाला रोजगार हमी खात्याचे मंत्री भरत गोगावले, महासंचालक (मनरेगा) नंदकुमार जे, राज्य गुणनियंत्रक राजेंद्र शहाणे, राज्य प्रशिक्षण समन्वयक निलेश घुगे, माजी कृषी मंत्री पाशा पटेल, जिल्हाधिकारी राजा दयानिधी, जिल्हा परिषद सीईओ तृप्ती दोडमिसे आणि अन्य महत्त्वाचे अधिकारी उपस्थित राहणार आहेत.

सर्व नागरिकांनी कार्यक्रमाला उपस्थित राहण्याचे आवाहन

आमदार गोपीचंद पडळकर यांनी तालुक्यातील सर्व सरपंच, माजी सरपंच, उपसरपंच, ग्रामपंचायत सदस्य, जिल्हा परिषद पदाधिकारी आणि स्थानिक नागरिकांनी या कार्यक्रमाला मोठ्या संख्येने उपस्थित राहावे, असे आवाहन केले आहे.

"हा प्रकल्प यशस्वी झाल्यास जत तालुका आर्थिकदृष्ट्या सक्षम होईल आणि भविष्यात प्रत्येक नागरिक लखपती होऊ शकेल," असे पडळकर यांनी सांगितले.

या ऐतिहासिक योजनेचा लाभ घेण्यासाठी एकत्र येऊया आणि तालुक्याचा विकास घडवूया!